Informámosvos da presenza  nas redes sociais dos proxectos Erasmus no centro IES Ordes:

     .En Facebook, co nome  Erasmus Ies Ordes  

     .En Instagram, co nome   erasmusiesordes  

           e tamén podedes seguirnos nos hashtags  #iesordes  e  #iesordesmovese

O proxecto "As vacinas agora e no pasado" na prensa

 Deixámosvos unhas imaxes de publicacións que fixeron 2 xornais sobre o proxecto que estamos a levar a cabo no noso centro: "As vacinas agora e no pasado: unha aproximación de xénero á ciencia":

Primeira Noticia, xaneiro de 2023

A Voz de Galicia, 03 febreiro 2023  (ligazón)

Visita preparatoria en Ordes

 O pasado xoves 12 e venres 13 do mes de xaneiro, estiveron no noso centro 3 profesoras do instituto de Lamego: Fátima, Ema e Isabel. O motivo da súa visita foi planificar as actividades que van a levar a cabo no noso centro cando se desplacen co seu alumnado a Ordes, dende o 8 ao 12 de maio.

            

Nestes 2 días, tamén puideron coñecer un pouco o noso pobo, Ordes, así como a profesorado do noso instituto. Asistiron ademais a unha clase de portugués coa profesora Laura, puideron coñecer as instalacións do noso instituto, e tamén fixeron unha presentación do sistema educativo portugués. 

Foi un tempo intenso e ben aproveitado!

O logo do noso proxecto (e o de Lamego)

 Como primeira actividade do proxecto, propúxose escoller un logo para o noso proxecto e outro para o do instituto de Lamego. Con este fin, o profesorado / alumnado do centro de Lamego votou polos logos que máis lles gustaron de entre os elaborados polo noso alumnado de 1º de bac e de 3º da ESO, e nós fixemos o mesmo cos logos deseñados por eles.

Estes foron os 2 logos gañadores:

 Logo de Andrea Silva, de 3º ESO A, alumna do noso centro

e o logo da autoría de Tomás Cordeiro, do centro de Lamego:

Esperamos que vos gusten ámbolos dous. A nós parécennos orixinais e creativos.

Visita preparatoria en Lamego

 O pasado xoves 7 de decembro 2022 trasladámonos  3 profesores do noso centro a Lamego, dentro dunha visita preparatoria do proxecto "As vacinas agora e no pasado". Nese día, fomos recibidos polos colegas portugueses, e puidemos coñecer a vila de Lamego (da que se achega algunha foto). 

No día seguinte, venres 8, estivemos reunidos no centro portugués Agrupamento de Escolas Latino Coelho, onde puidemos coñecer as súas instalacións, e planificar datas, actividades e traslados que se van levar a cabo cando o noso alumnado se traslade alí (do 17 ao 21 de abril do 2023) 

De igual maneira, profesoras do seu centro visitarannos no mes de xaneiro 2023 ao noso IES para planificar a mobilidade do seu alumnado a Ordes (do 08 ao 12 de maio 2023).

Presentación dun novo proxecto Erasmus

 Imos informarvos do novo proxecto Erasmus+, subvencionado pola Unión Europea, que nos foi aprobado e que imos levar a cabo neste curso 2022/23. Trátase dun proxecto KA122, e o seu título é "As vacinas agora e no pasado. Unha aproximación de xénero á ciencia"; este proxecto vai destinado a alumnado de 3º da ESO.

Os obxectivos deste proxecto son:

  .en 1º lugar, contactar cun centro estranxeiro e intercambiar vivencias e experiencias con el. Neste caso trátase do Agrupamento de Escolas Latino Coelho, en Lamego, Portugal.

  .en 2º lugar, fomentar a competencia en linguas estranxeiras do alumnado, en portugués e inglés, para comunicarse con outro alumnado da súa idade. Fomentar así mesmo a súa competencia dixital, para facer presentacións ou comunicarse online con ese alumnado.

  .3º, favorecer a inclusión de alumnado con distintos tipos de dificultades (socioeconómica, de aprendizaxe, físicas), para que poidan ter a posibilidade de realizar actividades que doutra maneira non levarían a cabo.

  .e, por último, e tal e como se expresa no título do proxecto, facer unha análise de como nos afectou a pandemia na nosa vida diaria persoal e social, en que nos axudaron as vacinas a superala e o seu papel na historia. Tamén, mulleres relevantes no ámbito científico e histórico, en especial as de ámbito local, como Isabel Zendal.

 Cómpre destacar que o centro portugués tamén ten un proxecto aprobado similar ao noso ("As vacinas agora e no pasado"), e que ao longo do proxecto haberá visitas preparatorias de profesorado a ambos os 2 centros, e tamén mobilidades de alumnado aos 2 centros, cunha duración dunha semana. 

 Seguro que este proxecto ha de ser do interese do noso alumnado e profesorado.